Сэрэмжлүүлэг: Цас орж, шуурна

Цаг уур, орчны шинжилгээний газраас энэ доло хоногт нутгийн зарим хэсгээр, уулархаг нутгаар цас орж, цасан шуурга шуурхыг анхааруулж байна. Тодруулбал, арваннэгдүгээр сарын 28-нд баруун аймгуудын нутгийн зүүн хэсэг, төв болон говийн аймгуудын нутгийн зарим газраар, арваннэгдүгээр сарын 29-нд Увс нуурын хотгор болон Хэнтийн уулархаг нутгаар, арваннэгдүгээр сарын 30-нд Увс нуурын хотгор болон Хөвсгөлийн уулархаг нутгаар, арванхоёрдугаар сарын 1-нд төв болон зүүн аймгуудын нутгийн зарим газраар цас орж, цасан шуурга шуурна.

Салхи ихэнх хугацаанд секундэд 6-11 метр, арваннэгдүгээр сарын 28-нд Алтайн салбар уулс, говь, талын нутгаар зарим үед секундэд 14-16 метр хүрч ширүүснэ. Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс, Халх голын хөндийгөөр шөнөдөө -29…-34 градус, өдөртөө -18…-23 градус, Алтай, Хангай, Хэнтийн уулархаг нутаг, Эг, Үүр, Хараа, Ерөө, Орхон, Сэлэнгэ, Туул, Тэрэлж, Хэрлэн, Онон, Улз голын хөндийгөөр шөнөдөө -24…-29 градус, өдөртөө -14…-19 градус, говийн бүс нутгийн өмнөд хэсгээр шөнөдөө -13…-18 градус, өдөртөө -2…-7 градус, бусад нутгаар шөнөдөө -19…-24 градус, өдөртөө -10…-15 градус хүйтэн байна.